প্রথম সর্গ – সামোদ দামোদর

মেঘৈর্ম্মেদুরম্বরং বনভুঃ শ্যামাস্তমালদ্রুমৈনক্তং
ভীরুরয়ং ত্বমেব তদিমং রাধে গৃহং প্রাপয় |
ইত্থং নন্দ-নিদেশতশ্চলিতয়োঃ প্রত্যধ্বকুঞ্জদ্রুমং
রাধামাধবয়োজয়স্তি যমুনাকুলে রহঃ কেলয়ঃ ||১||

বাগ্ দেবতাচরিতচিত্রিতচিত্তসদ্মা
পদ্মাবতীচরণচারণচক্রবর্ত্তী |
শ্রীবাসুদেবরতিকেলিকথাসমেত-
মেতং করোতি জয়দেব কবিঃ প্রবন্ধম্ ||২||

যদি হরিস্মরণে সরসং মনো
যদি বিলাসকলাসু কুতুহলম্ |
মধুরকোমলকান্তপদাবলীং
শণু তদা জয়দেবসরস্বতীম্ ||৩||

বাচঃ পল্লবয়ত্যুমাপতিধরঃ সন্দর্ভশুদ্ধিং গিরাং
জানীতে জয়দেব এব শরণং শ্লাঘ্যো দুরূহদ্রুতে |
শৃঙ্গারোত্তর-সত্প্রম্য়েরচনৈরাচার্য্য গোবর্ধন-
স্পর্দ্ধী কোহপি ন বিশ্রুতঃ শ্রুতিধরো ধোয়ী কবিষ্মাপতিঃ ||৪||

গীতম্

প্রলয়-পয়োধিজলে ধৃতবানসি বেদম্ |
বিহিত-বহিত্র-চরিত্রমখেদম্ ||
কেশবধৃত-মীনশরীর জয় জগদীশ হরে ||৫||

ক্ষিতিরতিবিপুলতরে তিষ্ঠতি তব পৃষ্ঠে |
ধরণি-ধারণ-কিণচক্র-গরিষ্ঠে ||
কেশব ধৃত-কূর্ম্মশরীর জয় জগদীশ হরে ||৬||

বসতি দশনশিখরে ধরণী তব লগ্না |
শশিনি কলঙ্ককলেব নিমগ্না ||
কেশব ধৃত-শূকররূপ জয় জগদীশ হরে ||৭||

তব কর-কমলবরে নখমদ্ভুত-শৃঙ্গম্ |
দলিত-হিরণ্যকশিপু-তনুভৃঙ্গম্ ||
কেশব ধৃত-নরহরিরূপ জয় জগদীশ হরে ||৮||

ছলয়সি বিক্রমণে বলিমদ্ভুতবামন |
পদনখ-নীর-জনিত-জন-পাবন ||
কেশব ধৃত-বামনরূপ জয় জগদীশ হরে ||৯||

ক্ষত্রিয়-রুধিরময়ে জগদপগতপাপম্ |
স্নপয়সি পয়সি শমিত-ভবতাপম্ ||
কেশব ধৃত-ভৃগুপতিরূপ জয় জগদীশ হরে ||১০||

বিতরসি দিক্ষু রণে দিক্পতি কমনিয়ম্ |
দশমুখ-মৌলিবলিং রমণীয়ম্ ||
কেশব ধৃত-রামশরীর জয় জগদীশ হরে ||১১||

বহসি বপুষি বিশদে বসনং জলদাভম্ |
হলহতি-ভীতি-মিলিত-যমুনাভম্ ||
কেশব ধৃত-হলধররূপ জয় জগদীশ হরে ||১২||

নিন্দসি যজ্ঞবিধেরহহ শ্রুতিজাতম |
সদয়হৃদয়-দর্শিত-পশুঘাতম্ ||
কেশব ধৃত-বুদ্ধশরীর জয় জগদীশ হরে ||১৩||

ম্লেচ্ছ-নিবহ-নিধনে কলয়সি করবালম্ |
ধূমকেতুমিব কিমপি করালম্ ||
কেশব ধৃত-কল্কিশরীর জয় জগদীশ হরে ||১৪||

শ্রীজয়দেবকবেরিদমুদিতমুদারম্ |
শৃণু সুখদং শুভদং ভবসারম্ ||
কেশব ধৃত-দশবিধরূপ জয় জগদীশ হরে ||১৫||

বেদানুদ্ধরতে জগন্তি বহতে ভূগোলমুদ্বিভ্রতে |
দৈত্যং দারয়তে হলং কলয়তে কারুণ্যমাতন্বতে ||
ম্লেচ্ছান্ মূর্চ্ছয়তে দশাকৃতিকৃতে কৃষ্ণায় তুভ্যং নমঃ ||১৬||

গীতম্
গুর্জ্জরীরাগেণ নিঃসারতালেন চ গীয়তে

শ্রিতকমলাকুচমণ্ডল ধৃত কুণ্ডল কলিতললিতবনমাল |
. জয় জয় দেব হরে ||১৭||

দিনমণিমণ্ডল মণ্ডন ভবখণ্ডন মুনিজনমানসহংস |
. জয় জয় দেব হরে ||১৮||

কালিয়বিষধরগঞ্জন জনরঞ্জন যদুকুলনলিনদিনেশ |
. জয় জয় দেব হরে ||১৯||

মধুমুরনরকবিনাশন গরুড়াসন সুরকুলকেলিনিদান |
. জয় জয় দেব হরে ||২০||

অমলকমলদললোচন ভবমোচন ত্রিভূবনভবননিদান |
. জয় জয় দেব হরে ||২১||

জনকসুতাকৃতভূষণ জিতদূষণ সমরশমিতদশকণ্ঠ |
. জয় জয় দেব হরে ||২২||

অভিনবজলধরসুন্দর ধৃতমন্দর শ্রীমুখচন্দ্রচকোর |
. জয় জয় দেব হরে ||২৩||

তব চরণে প্রণতা বয়-মিতিভাবয় কুরু কুশলং প্রণতেষু |
. জয় জয় দেব হরে ||২৪||

শ্রীজয়দেবকবেরিদং কুরুতে মুদং মঙ্গলম্ উজ্জ্বলগীতিঃ |
. জয় জয় দেব হরে ||২৫||

পদ্মাপয়োধরতটিপরিরম্ভলগ্নকাশ্মিরমুদ্রিতমুরো মধুসূদনস্য |
ব্যক্তানুরাগমিব খেলদনঙ্গখেদস্বেদাম্বুপূরমনুপূরয়তু প্রিয়ং বঃ ||২৬||

বসন্তে বাসন্তীকুসুমসুকুমারৈরবয়বৈ-
র্ভ্রমন্তীং কান্তারে বহুবিহিতকৃষ্ণানুসরণাম্ |
অমন্দং কন্দর্প-জ্বরজনিতচিন্তাকুলতয়া
বলদ্বাধাং রাধাং সরসমিদমুচে সহচরী ||২৭||

গীতম্
বসন্তরাগযতিতালাভ্যাং গীয়তে

ললিতলবঙ্গলতাপরিশীলনকোমলমলয়সমীরে |
মধুকরনিকরকরম্বিতকোকিলকূজিতকুঞ্জকুটিরে ||
বিহরতি হরিরিহ সরসবসন্তে |
নৃত্যতি যুবজনেন সমং সখি বিরহিজনস্য দুরন্তে ||২৮||

উন্মদমদনমনোরথপথিকবধুজনজনিতবিলাপে |
অলিকুলসঙ্কুলকুসুমসমুহনিরাকুলবকুলকলাপে ||২৯||

মৃগমদসৌরভরভসবশংবদনবদলমালতমালে |
যুবজনহৃদয়বিদারণমনসিজনখরুচিকিংশুকজালে ||৩০||

মদনমহীপতিকনকদণ্ডরুচিকেশরকুসুমবিকাশে |
মিলিতশিলীমুখপাটলিপটলকৃতস্মরতূণবিলাসে ||৩১||

বিগলিতলজ্জিতজগদবলোকনতরুণকরুণকৃতহাসে |
বিরহিনিকৃন্তনকুন্তমুখাকৃতিকেতকিদন্তুরিতাশে ||৩২||

মাধবিকাপরিমলললিতে নবমালিকয়াতিসুগন্ধো |
মুনিমনসামপি মোহনকারিণি তরুণাকারণবন্ধৌ ||৩৩||

স্ফুরদতিমুক্তলতাপরিরম্ভণপলকিতমুকুলিতচূতে |
বৃন্দাবনবিপিনে পরিসরপরিগতযমুনাজলপূতে ||৩৪||

শ্রীজয়দেবভণিতমিমুদয়তি হরিচরণস্মৃতিসারম্ |
সরসবসন্তসময়বনবর্ণনমনুগতমদনবিকারম্ ||৩৫||

দরবিদলিতমল্লীবল্লিচঞ্চত্পরাগ-
প্রকটিতপটবাসৈর্বাসয়ন্ কাননানি |
ইহ হি দহতি চেতঃ কেতকীগন্ধবন্ধুঃ
প্রসরদসমবাণপ্রাণবদ্ গন্ধবাহঃ ||৩৬||

অদ্যোত্সঙ্গবসদ্ভুজঙ্গকবলক্লেশাদিবেশাচলং
প্রালেয়প্লবনেচ্ছয়ানুসরতি শ্রীখণ্ডশৈলানিলঃ |
কিঞ্চ স্নিগ্ধরসালমৌলিমুকুলান্যালোক্য হর্ষোদয়া-
দুন্মীলন্তি কুহুঃ কুহুরিতি কলোত্তালাঃ পিকানাংগিরঃ ||৩৭||

উন্মীলন্মধুগন্ধলুব্ধমধুপব্যাধূতচূতাঙ্কুর-
ক্রীড়ৎকোকিলকাকলীকলকলৈরুদ্গীর্ণকর্ণজ্বরাঃ |
নীয়ন্তে পথিকৈঃ কথং কথমপি ধ্যানাবধানক্ষণ-
প্রাপ্তপ্রাণসমাসমাগমরসোল্লাসৈরমী বাসরাঃ ||৩৮||

অনেকনারীপরিরম্ভসংভ্রমস্ফুরন্মনোহারিবিলাসলালসম্ |
মুরারিমারাদুপদর্শয়ন্ত্যসৌ সখীসমক্ষং পুনরাহ রাধিকাম্ ||৩৯||

গীতম্
রামকিরীরাগযতিতালাভ্যাং গীয়তে

চন্দনচর্চ্চিতনীলকলেবরপীতবসনবনমালী |
কেলিচলন্মণিকুণ্ডলমণ্ডিতগণ্ডযুগস্মিতশালী ||
হরিরিহ মুগ্ধবধূনিকরে বিলাসিনি বিলসতি কেলিপরে ||৪০||

পীনপয়োধরভারভারেণ হরিং পরিরভ্য সরাগম্ |
গোপবধুরনুগায়তি কাচিদুদঞ্চিতপঞ্চমরাগম্ ||৪১||

কাপি বিলাসবিলোলবিলোচনখেলনজনিতমনোজম্ |
ধ্যায়তি মুগ্ধবধুরধিকং মধুসূদনবদনসরোজম্ ||৪২||

কাপি কপোলতলে মিলিতা লপিতুংকিমপি শ্রুতিমুলে |
চারু চুচুম্ব নিতম্ববতী দয়িতং পুলকৈরনুকূলে ||৪৩||

কেলিকলাকুতুকেন চ কাচিদমুং যমুনাজলকূলে |
মঞ্জুলবঞ্জুলকুঞ্জগতং বিচকর্ষ করেণ দুকুলে ||৪৪||

করতলতালতরলবলয়াবলিতকলিতকলস্বনবংশে |
রাসরসে সহনৃত্যপরা হরিণা যুবতিঃ প্রশশংসে ||৪৫||

শ্লিষ্যতি কামতি চুম্বতি কামপি কামপি রময়তি রামাম্ |
পশ্যতি সস্মিতচারু পরামপরামনুগচ্ছতি বামাম্ ||৪৬||

শ্রীজয়দেবভণিতমিদমদ্ভুতকেশবকেলিরহস্যম্ |
বৃন্দাবনবিপিনে ললিতং বিতনোতু শুভানি যশস্যম্ ||৪৭||

বিশ্বেষামনুরঞ্জনেন জনয়ন্নানন্দমিন্দীবর-
শ্রেণীশ্যামলকোমলৈরুপনয়ন্নঙ্গৈরনঙ্গোত্সবম্ |
স্বচ্ছন্দং ব্রজসুন্দরীভিরভিতঃ প্রত্যঙ্গমালিঙ্গতঃ
শৃঙ্গারঃ সখি মূর্ত্তিমানিব মধৌ মুগ্ধহরিঃ ক্রীড়তি ||৪৮||

রাসোল্লাসভরেণ বিভ্রমভৃতামাভীরবামভ্রুবাম্
অভ্যর্ণে পরিরভ্য নির্ভরমুরঃ প্রেমান্ধয়া রাধয়া |
সাধু তদ্বদনং সুধাময়মিতি ব্যাহৃত্য গীতস্তুতি-
র্ব্যাজাদুদ্ভটচুম্বিতঃ স্মিতমনোহারী হরিঃ পাতু বঃ ||৪৯||