নবম সর্গ – মুগ্ধ-মুকুন্দ

তামথ মন্মথখিন্নাং রতিরসভিন্নাং বিষাদসম্পন্নাম্ |
অনুচিন্তিতহরিচরিতাং কলহান্তরিতামুবাচ রহঃ সখী ||১||

গীতম্
রামরিরীরাগযতিতালাভ্যং গীয়তে

হরিরভিসরতি বহতি মৃদুপবনে |
কিমপরমধিকসুখং সখি ভবনে ||
মাধবে মা কুরু মানিনি মানময়ে ||২||

তালফলাদপি গুরুমতিসরাসম্
কিমু বিফলীকুরুষে কুচকলসম্ ||৩||

কতি ন কথিতমিদমনুপদমচিরম্ |
মা পরিহর হরিমতিশয়রুচিরম্ ||৪||

কিমিতি বিষীদসি রোদিষি বিকলা
বিহসতি যুবতিসভা তব সকলা ||৫||

সজলনলিনীদলশ শীলিতশয়নে
হরিমবলোকয় সফলয় নয়নে ||৬||

জনয়সি মনসি কিমিতি গুরুখেদম্
শৃণু মম বচনমনীহিতভেদম্ ||৭||

হরিরূপযাতু বদতু বহু মধুরম্ |
কিমিতি করোষি হৃদয়মতিবিধুরম্ ||৮||

শ্রীজয়দেবভণিতমতিললিতম্
সুখয়তু রসিকজনং হরিচরিতম্ ||৯||

স্নিগ্ধে যৎ পরুষাসি যৎ প্রণমতি স্তব্ধাসি যদ্রাগিণি
দ্বেষস্থাসি যদুন্মুখে বিমুখতাং যাতাসি তস্মিন প্রিয়ে |
তদযুক্তং বিপরীতকারিণি তব শ্রীখণ্ডচর্চ্চা বিষং
শীতাংশুস্তপনো হিমং হুতবহঃক্রীড়ামুদো যাতনাঃ ||১০||

সান্দ্রানন্দপুরন্দরদিদিবিষদবৃন্দৈরমন্দাদরা-
দানমম্রৈর্মুকুটেন্দ্রনীলমণিভিঃ সন্দর্শিতেন্দীবরম্ |
স্বচ্ছন্দং মকরন্দসুন্দরগলন্মন্দাকিনীমেদুরং
শ্রীগোবিন্দপদারবিন্দমশুভস্কন্দায় বন্দামহে ||১১||